Гэрээ, хэлцэл хийхэд “төлөөлөх эрх”-ийг хэрхэн олж авах вэ?

• 2024-11-07
• 20

 

Төлөөлөгчийн бүрэн эрх хэрхэн үүсдэг вэ? 

Монгол Улсын Иргэний хуульд зааснаар төлөөлөгчийн бүрэн эрх нь

• хуулийн дагуу буюу
• итгэмжлэлийн үндсэн дээр үүснэ.

 

Итгэмжлэлээр хэн төлөөлж болох вэ?  

• Иргэний эрх зүйн бүрэн, бүрэн бус, хязгаарлагдмал чадамжтай иргэн

• Хуулийн этгээд

 

Иргэний эрх зүйн бүрэн бус буюу хязгаарлагдмал чадамжтай иргэнээр [хууль ёсны төлөөлөгчийнх нь зөвшөөрлийг авалгүйгээр] төлөөлүүлсэн хүн, хуулийн этгээд нь ингэж төлөөлүүлснээс бусдад учруулсан гэм хорыг өөрөө хариуцна.

 

Дараах шаардлагыг хангаагүй итгэмжлэл хүчин төгөлдөр бус байна:

• олгосон он, сар, өдрийг заах;
• [хуульд заасан бол] нотариатаар гэрчлүүлэх;
• итгэмжлэлийг тодорхой хугацаагаар олгох бол хугацааг заах

 

Цахим итгэмжлэл нь дээрх шаардлагаас гадна Цахим гарын үсгийн тухай хуулийн шаардлагыг хангах ёстой.

 

Итгэмжлэлийн хугацаа

• Хугацаатай олгох итгэмжлэл гурван жилээс илүүгүй хугацаатай байна.
• Хугацаа заагаагүй итгэмжлэл олгосон өдрөөс хойш нэг жил хүчин төгөлдөр байна.

 

Хэдийд ч

• төлөөлүүлэгч итгэмжлэлээ хүчингүй болгох,
• төлөөлөгч итгэмжлэлээс татгалзах эрхтэй.

Энэ эрхийг эдлэхгүй гэж тохирсон хэлцэл [хүчин төгөлдөр бус байна].

 

Бичгээр, эсвэл цахим хэлбэрээр олгох итгэмжлэл нь дараахь шаардлагыг хангах ёстой:

• итгэмжлэлд төлөөлүүлэгч гарын үсэг зурсан байх,
• хуулийн этгээдийн итгэмжлэлд [эрх баригч гарын үсэг зурж], тамга, тэмдэг дарсан байх;
• хуулийн этгээдийн эд хөрөнгийг хүлээн авах, бусдад шилжүүлэх, захиран зарцуулах эрх олгосон итгэмжлэлд [эрх баригчаас гадна нягтлан бодогч] гарын үсэг зурсан байх;

 

Төлөөлүүлэгч нь [амаар, бичгээр, цахим хэлбэрээр]

• төлөөлөгч болон
• түүнтэй гэрээ, хэлцэл хийх гуравдагч этгээдэд

төлөөлүүлэх тухайгаа, мөн төлөөлөгчийн бүрэн эрхийн талаар [мэдэгдэж] төлөөлөгчид бүрэн эрх олгож болно.

 

Итгэмжлэлийг шилжүүлж болох уу?  

Итгэмжлэлээр эрх олгосон үйл ажиллагааг Төлөөлөгч биечлэн гүйцэтгэх үүрэгтэй.

Гэхдээ дараах нөхцөлд итгэмжлэлийг шилжүүлж болно:

• итгэмжлэлд эрх олгосон үйл ажиллагааг [бусдаар гүйцэтгүүлж болохоор заасан]
• итгэмжлэгчийн ашиг сонирхлын үүднээс [зайлшгүй шаардлагатай байвал]
• шилжүүлсэн итгэмжлэлийн хугацаа үндсэн итгэмжлэлийн хугацаанаас их байж болохгүй.
• үндсэн итгэмжлэл дуусгавар болсноор шилжүүлсэн итгэмжлэл дуусгавар болно.

 

Төлөөлөгч эрхээ шилжүүлснээ мэдэгдэх үүрэгтэй

• төлөөлөгч эрхээ бусдад шилжүүлсэн тухай болон
• итгэмжлэлийг шилжүүлэн авсан этгээдийн талаар төлөөлүүлэгчид [мэдэгдэх үүрэгтэй].
• энэ үүргээ биелүүлээгүй бол эрх шилжүүлж авсан этгээдийн үйл ажиллагааны үр дагаврыг өөрөө хариуцна.

 

(Хэлцэлд төлөөлөх ойлголтыг Иргэний хуулийн 7-р бүлгийн 62-70 дугаар зүйлээс илүү тодруулж харах хэрэгтэй)